D’ansciuda festa sun Jëuf de Sela
Generela - Tla senteda dl Cunsëi dla Union Generela di Ladins dla Dolomites cun a cë la presidënta Milva Mussner iel unì fat ora de mëter a jì ai 17 de lugio dl ann che vën na manifestazion sun Jëuf de Sela, setant’ani do la desmustrazion de ulentà de unità ladina, che fova stata propi sun Jëuf de Sela ai 14 de lugio dl 1946.
L unirà fat n monumënt nuef sun l model bele fat n gaujion dl 50ejim anuel. La scultura de bront fova unida metuda su permez a n puron dlongia l chiosch “In Sella” dl didancuei, diesc ani do iela unida spusteda via n Salei (cëla foto njunteda): duta la cin’ Unions di Ladins fej na seva, uniuna de na sort de lën defrënt, la Generela se cruzia dl pustamënt, dla tofla de stlarimënt y dla locazion nce dla bandiera ladina; n acurdanza cun i patrons dl terac, uelen cuncé su chësta strutura de lën de na majera grandëza tla ujinanzes dla capela sun Jëuf de Sela.
Oradechël uniràl metù a jì na defileda pra chëla che l unirà nvià a fé pea danter l auter duta la lies de ulentariat dla Ladinia; do la santa mëssa y la rujenedes dl’autoriteies, àn ntenzion de nvië duta la mujighes dla Ladinia a suné dutes deberieda l inn ladin y mo n valgun pec te pra sot ala furcela de Saslonch.
“Cianta con nos” y pelegrinaje a Oies
Coche da tradizion, toma dl 2016 nce l apuntamënt cun l festival ladin di cores de mutons “Cianta con nos”. Chëst iede uniràl metù a jì deberieda cun la Union di Ladins dla Val Badia, te n luech de chësta valeda y te na viesta nueva.
Ai 24 de setëmber de n auter ann saràl inò l pelegrinaje ladin a Oies, dal Sant Ujep Freinademetz; la cunlaurazion dla Generela en cont dl’urganisazion ie l ann che vën cun la Unions di Ladins de Fedom y Col.
Publicazion y proiet europeich
La Generela à nce ntenzion de dé ora na publicazion che reverda duta la Ladinia. N ie nce tl lëur de njeinië ca n proiet europeich sun na pruposta bele bëndebo’ cuncreta, ma che ie mo tl nascer y da udëi sce n ie boni de purté inant.
L Cunsëi dla Generela à fat ora de ne auzé nia i priejes di retlams tla USC, che resta perchël unfat coche te chisc ultims ani nce per l ann che vën. L’Adunanza generela per l’apruvazion dl bilanz de previjion dla Union Generela di Ladins dla Dolomites ie unida fisseda ai 28 de nuvëmber.