Union Generela di Ladins dla Dolomites

Publizierte Artikel

Sun l iade a Oies

L „Pelegrinaje Ladin" da Badia su Oies, ciasa nadel de Sant Ujöp Frenademetz, é chest ann vegnú coordiné y abelí da l'Union di Ladins da Fodom
Iaco Rigo

I pelegrins é rovés adum en sabeda domesdí, dant otedí, da dutes les vals ladines entourn l Sela, per tó pert al „iade con crusc" enfin a Oies, perian y s'archietan dant a les catodesc stazions dla Via Crucis enfin permez a la Gliejia a Oies, olache siur Pire Irsara á conzelebré con d'autri prevesc la messa ladina d'ocajion y la prefestiva, te na gliejia tocia y plena de fediei. Bel, bon y plen de solenité y temperament l cianté dl Cor de gliejia da Fodom (Cor „San Iaco"), sot la direzion de Denni Dorigo.

Dant pié via da la Glijia de Badia de vers de Oies ti á la presidenta dla Union Generela di Ladins dla Dolomites (organisadoura dl „Pelegrinaje Ladin" a Oies dal ann passé encá) Milva Mussner y l plovan da Col Giampiero Pellegrini sport l benvegnú ai colaboradours dles Unions di Ladins y ai fediei. Al orghen de gliejia, y plu tert ence tla gliejia a Oies, á Oscar Nagler da Fodom soné y acompagné i fediei y l Cor da Fodom.
Tla perdica a Oies á siur Pire Irsara auzé fora l messaje de vita dl Sant Ladin tla Cina y l dovei cristian dl popul ladin de ti daurí su les portes a les persones che á debujen de speisa y alberch. Te nosc temps de migrazions n pue soura dut l mond se mostra l ester cristian tla misericordia y tl aiut ai autri.