Union Generela di Ladins dla Dolomites

Publizierte Artikel

Hilda, die Mutter der Ladiner

La gran y longia ativité de volontariat de Hilda Pizzinini al servisc dla mendranza ladina ne cleca nia per caraterisé ence l spirit che animova chela che é steda bonamenter l’ultima personalité veramenter carismatica anter i idealisć y ativisć ladins, che se ova dé ju truep con les unions, istituzions y la prepolitica.

Da bona maestra ova Hilda de Runch valorisé si talent particolar tl’ert dla comunicazion y di raporc umans, savan da tre ite y motivé con gran convinzion truepa jent a coltive i valours dla ladinité te vigni ciamp y ocajion.

Hilda Pizzinini fova steda una dles personalités plu nobles y autentiches dla “aisciuda ladina” da la fin di agn 1970 ensú, canche al fova vegnú mané do y combatú per arjonje na maioura sconanza y n maiour svilup dla mendranza. La maestra en pension y ostira de profescion, mo ladina de vocazion, á lascé l segn oramai te vigni ciamp dla vita culturala y soziala, da les unions a la stampa, da la scola al teater ladin y tla mediazion prepolitica, olache i ladins é plutosc debli y sotmetus.

Da ostira che se infidova da dí cie che ala ponsova, óvela ence sensibilisé y motivé operadours turistics a ne ascogne nia la ladinité tl raport autentich con i ghesć.

Canche ala portova dant ghiranzes ladines, valova y fajova les propostes de Hilda Pizzinini plu fazion che cheles de d’autri, ciuldí che ala savova da comuniché te na maniera simpatica y clera, tant, che ence les autorités politiches stentova o ne se infidova nia da ti dé tort. 

I plu riei da storje dl vers dla ladinité gniva magari “cujinés” y convinc con na bona cena ofrida da ela te si hotel La Stüa a San Ciascian.

L dialogh y la mediazion anter cultura y politica ti stova particolarmenter a cuer per realisé sia vijion de na politica y cultura a ben de duc i ladins despartis te does regions y trei provinzies con na empatia particolara per chi plu debli de Souramunt.

I politics che ala encontova da presidenta dla Union Generela, restova imprescionés dal coraje zivil y da la militanza convinta de chela che possa gní conscidreda na Catarina Lanz moderna dla fin dl 1900, che n’á nia combatú con la furcia, ma con la forza dla parola che vegn dal cuer y con l savei da maestra paladina de si ladins.

Duc jiva gian a les sentedes y encontedes con Hilda Pizzinini, ciuldí che ala savova da motivé y da ti dé importanza a vignun te sia funzion.

Ajache Hilda n’ova nia mutons, óvela adoté y serví idealmenter duc i ladins che ai fajessa pert de sia familia. 

Ence coraje y la dignité con chela che ala ova soporté la malatia longia, senza renunzié perchel a se dé ju con la ladinité, desmostra n profil aut y i valours autentics dla “grand dame” dla Ladinia.

Savon che la sconanza dla mendranza passa souraldut tres sia prejenza ti media, ova Hilda Pizzinini ence combatú truep ti agn 1980 souraldut, per che i ladins ciafessa la “televijion ladina” preveduda da la lege.

Ence per chest impegn, che á jové truep per svilupé la Rai Ladinia co che ala é aldidancuei, se meritela n giulan de cuer, giulan che te sia derivaziun dal latin vuel dí “Die l’ama” y i ladins ence!

La mort de Hilda lascia na gran arpejion de fac che sighita de porté fruc sun l troi dla emanzipazion dla mendranza ladina.

Erwin Frenes, Rai Ladinia