Union Generela di Ladins dla Dolomites

Publizierte Artikel

Eine Erinnerung an Ilda Pizzinini (ladinischer Artikel)

La Usc di Ladins

Drët truepa jënt ladina ie n lunesc ai 20 de lugio unida adalerch te dlieja de S. Linert a tò cumià da anda Ilda Pizzinini, presidënta d’unëur de duta la Unions di Ladins de valeda. L ie stat bel a udëi nce trueps cun l guant da zacan a ti fé unëur a Ilda, ëila à dessegur abù legrëza.

Per 17 ani alalongia, dal 1986 al 2003, iela stata a cë dla Union Generela di Ladins dla Dolomites, mo dant, per diesc ani, presidënta dla Union di Ladins dla Val Badia (1978-1988), nona - tota, coche n dij tla Val Badia - dla bandiera ladina dla Generela y - ie njonte - da truep ani incà cumëmbra danter l auter nce dla Union di Ladins de Gherdëina.

Cun gran pascion y idealism, ntujiasm y mutivazion, àla dedicà na vita ntiera a bën dla cultura ladina, dl’unità di ladins, de nosc lingaz ladin, dut y daniëura tl spirt dl ulentariat y zënza ambizions persuneles, chëstes fova per ëila prerugatives per fé n bon lëur.

Gran fermëza y arteniënza, spirt positif ma cumbatif, l’à da for incà carateriseda, nia per nìa fòvela cunesciuda nce dedora de nosta valedes coche “la gran ëila dla Ladinia”. Tres chësta cualiteies iela stata bona de arjonjer truep per la cultura ladina n generel. La à trat su y mutivà chi che ti stajova dlongia, la à scumbatù per la cossa ladina, tl ciamp dla scola, tl ciamp dl turism de si valeda, tl’editorìa cun La Usc di Ladins, tla Generela tres i cuntat strënc cun duta la cin’ valedes ladines. Dlonch ti ufizies dla Provinzies y nchin a Roma plu de n iede iela sauteda zënza mei se pierder d’am per se la fé valëi, per arjonjer l drë’ recunescimënt che ti spieta ai ladins, per crì finanziamënc. Nchin che la ne ova nia arjont cie che la se ova tëut dant, ne ti la zedòvela nia.

Dessegur ne saràl suvënz nia stat saurì fé, a abiné sot a un n ciapel la cin’ unions, a tenì adum la cin’ anes, i cin’ cëves, ma cun cuer y ana àla cherdù tla cossa ladina y cun si fé diplomatich, si savëi da se tò la jënt se àla nce davanià l respet y la crëta de chëi plu scetics de viers dla cuestions ladines. N’ëila sterscia che ova fat unì sterscia la Generela!

“Nëus son ladins y rujenon ladin”, chësc ti ova dit si oma y chësc àla pu suvënz dit ai microfonns de jurnalisć y nce a mi mo dan da puech, ntan una de nosta ancuntedes y ciaculedes longes su te si cësa a La Ila, scebën bele suferënta per si malatia. Eh, la rujeneda ladina, si mantenimënt y svilup propi nce tres l lingaz scrit uniter, fova bën chël che ti stajova a cuer l plu de dut. “Per mantenì y svilupé l bel y l bon lingaz ladin”, coche ëila nstëssa me à dit, y me à nce dat pea plates ntieres plëines de cunsëies y de de bona ideies nueves per mené inant la Generela. 

L mescedoz danter vester bona de capì l’ana dla populazion ladina, de capì la ravises dl popul ladin y si snait a dì ora bel bret si cunvinzions cun l’engajamënt che ëila ova, ie - da mé ora - stat l suzes de si arjontes te y per l mond ladin. Y per chësc si mpëni per la cossa ladina ulons mo n iede ti dì n gran giulan, de gra, detelpai, diotelpaie, granmarzé coche dijon nëus ladins dla Val Badia, de Gherdëina, dla Val de Fascia, de Fedom y de Ampëz.

Nce la redazion de La Usc di Ladins, la plata ladina de duc i ladins dles Dolomites, sënt dut l dovëi de rengrazië la persunalità y l engajamënt de Ilda Pizzinini. Zënza d’ëila ne pudëssen al didancuei nia liejer uni vënderdi na edizion frëscia! 

Do puec ani che Ilda fova presidënta dla Union Generela, union editëura dla USC dal 1972 incà, unìvel pensà a n foliet ladin che ne unissa nia ora mé plu un n iede uni chinesc di, ma bën n iede al’ena. L saut fova stat grant, ma l curaje y la perseveranza dla presidënta Ilda, mei stancia de lauré y mei stufa de abiné adum la finanzes, à pudù unì recumpensedes cun na gran sudesfazion a udëi, do puec ani uperatifs, bën trëi redazions prufescioneles tla Val Badia, te Gherdëina y te Fascia, y na rë de cunlaurazion ulentera efiziënta nce te Fedom, te Ampëz y a Col. Da pert dla redazion: Giulan, Ilda! 

Per mé persunalmënter, che son śën da puech tla piedies de nosta presidënta d’unëur, n gran dietelpaie de cuer Ilda, per dut ti nseniamënt de gran valuta, per me avëi dat, dantaldut te chisc ultims mënsc, curaje y ueia a lauré inant per la Union Generela y la cultura ladina. Y ch’la bela rojula d’arjënt che te me es scincà me dajerà forza y legrëza.

Te me sares for de ejëmpl!

Seniëur, a Ilda ulons tlo ti dì n gran dilan! Che la pausse tla pesc de Chël Bel Die.

Milva Mussner, 

presidënta dla Union Generela di Ladins dla Dolomites